அதிகாரம் : அல்ஜுமுஆ
அருளப்பெற்ற இடம்:
மதீனா | வசனங்கள்: 12
பிரிவுகள்: 2
- அளவற்ற அருளாளனும், மேன்மேலும் கருணை காட்டுபவனுமாகிய அல்லாஹ்வின் பெயரால் (ஓதுகின்றேன்).
- வானங்களிலும், பூமியிலுமுள்ளவையெல்லாம் அரசனும், தூயவனும், வல்லமையுள்ளவனும், நுண்ணறிவுள்ளவனுமாகிய அல்லாஹ்வின் தூய்மையை எடுத்துரைக்கின்றன.
- அவனே எழுதப்படிக்கத் தெரியாத மக்களுக்கு - அவர்கள் இதற்கு முன்னர் தெளிவான வழிகேட்டில் இருந்த போதிலும் - அவனது கட்டளைகளைப் படித்துக் காட்டி, அவர்களைத் தூய்மைப்படுத்தி, அவர்களுக்கு வேதத்தையும், நுட்பமான அறிவையும் கற்றுக் கொடுக்கும் ஒரு தூதரை அவர்களிலிருந்தே அனுப்பினான்.
- மேலும் இதுவரை அவர்களுடன் சேராத மற்றவர்களுக்கிடையிலும்1 (அவரை எழுப்புவான்). அவன் வல்லமை மிக்கவனும், நுண்ணறிவுள்ளவனுமாவான்.
- இது அல்லாஹ்வின் அருளாகும். தான் விரும்புபவருக்கு அவன் அதனை வழங்குகிறான். அல்லாஹ் பேரருள் உடையவனாவான்.
- தவ்ராத்(தின் சட்டம்) சுமத்தப்பட்டு, ஆனால் அதன்படி செயல்படாதவர்களின் உவமை, புத்தகங்(களின் சுமை)களைச் சுமக்கும் கழுதையின் உவமையைப் போன்றதாகும். அல்லாஹ்வின் அடையாளங்களை ஏற்க மறுக்கும் மக்களின் உவமை மிகக் கெட்டதே. அநீதியிழைக்கும் மக்களுக்கு அல்லாஹ் நேர்வழி காட்டுவதில்லை.
- நீர் கூறுவீராக! யூதர்களே; மற்றெல்லா மக்களையும் விட நீங்கள் தாம் அல்லாஹ்வின் நண்பர்கள் என்று நீங்கள் உரிமை கொண்டாடுகின்றீர்கள் என்றால் - இ(ந்த வாதத்)தில் நீங்கள் உண்மையாளர்களாயின் - நீங்கள் மரணத்தை நாடுங்கள். (அதாவது முஹம்மது நபி (ஸல்) அவர்களுடன் முபாஹலா செய்யுங்கள்).
- ஆனால் அவர்களது கைகள் (ஏற்கனவே) செய்து அனுப்பியுள்ள செயல்கள் காரணமாக, அதனை ஒருபோதும் அவர்கள் நாடமாட்டார்கள். மேலும் அநீதியிழைப்பவர்களை அல்லாஹ் நன்கு அறிகின்றான்.
- நீர் கூறுவீராக! எந்த மரணத்திலிருந்து நீங்கள் விரைந்தோடுகின்றீர்களோ, அந்த மரணம் நிச்சயமாக உங்களை வந்தடையும். பின்னர் நீங்கள் மறைவானதையும், வெளிப்படையானதையும் அறிபவனிடம் திரும்பக் கொண்டு செல்லப்படுவீர்கள். அவன் உங்களுக்கு நீங்கள் செய்து கொண்டிருப்பவை பற்றி அறிவிப்பான்.
- நம்பிக்கை கொண்டவர்களே! வெள்ளிக்கிழமையில் தொழுகைக்காக அழைக்கப்பட்டால், நீங்கள் அல்லாஹ்வை நினைவுகூர்வதற்கு விரைந்து செல்லுங்கள். (மற்றெல்லா) வியாபாரங்களையும் விட்டு விடுங்கள். நீங்கள் அறிந்திருப்பின் இது உங்களுக்கு மிகச் சிறந்ததாகும்.
- தொழுகை நிறைவேற்றப்பட்டதும், பூமியில் பரவிச் சென்று, அல்லாஹ்வின் அருளைத் தேடுங்கள், நீங்கள் வெற்றி பெறுவதற்காக அல்லாஹ்வை மிகுதியாக நினைவு கூருங்கள்.
- ஆனால் அவர்கள் வியாபாரத்தையோ, கேளிக்கைகளையோ காணும் போது அதன்பால் ஈர்க்கப்பட்டு, உம்மை (தனித்து) நிற்க வைத்து விடுகின்றனர். நீர் கூறுவீராக: அல்லாஹ்விடமுள்ளது கேளிக்கையை விடவும், வியாபாரத்தை விடவும் மிகச்சிறந்ததாகும். அல்லாஹ் மிகச்சிறந்த உணவளிப்பவனாவான். ரு 2
