அதிகாரம்: அல் வா(க்)கிஅ(த்)
அருளப்பெற்ற இடம்
: மக்கா | வசனங்கள்: 97
பிரிவுகள்: 3
- அளவற்ற அருளாளனும், மேன்மேலும் கருணை காட்டுபவனுமாகிய அல்லாஹ்வின் பெயரால் (ஓதுகின்றேன்).
- தவிர்க்க முடியாததென்று முடிவு செய்யப்பட்ட நிகழ்ச்சி நிகழும் போது1.
- அதன் நிகழ்விற்கு எந்த மறுப்புமில்லை.
- சிலரைத் தாழ்த்தியும், சிலரை உயர்த்தியும்2 (அது நிகழும்).
- பூமி (பயங்கரமான) அதிர்ச்சிக்குள்ளாக்கப்படும் போது,
- மலைகள் தவிடுபொடியாக்கப்படும் போது.
- அவை சிதறடிக்கப்பட்ட துகள்களைப் போன்றவையாகி விடும்.
- நீங்கள் மூன்று பிரிவினர்களாக(ப் பகுக்கப்பட்டு) இருப்பீர்கள்.
- (ஒன்று) வலப்பக்கத்தவர். வலப்பக்கத்தவரின் நிலை என்ன?
- (இன்னொன்று) இடப்பக்கத்தவர். இடப்பக்கத்தவரின் நிலை என்ன? (என்பதைப் பற்றி உமக்கென்ன தெரியும்?).
- இன்னுமொன்று (நம்பிக்கையிலும், செயலிலும்) முதன்மையானவர்கள், இவர்கள் முதன்மையானவர்களேயாவர்.
- இவர்களே (இறைவனுக்கு) நெருங்கியவர்களாவார்கள்.
- பேரின்பத் தோட்டங்களில் (இவர்கள் வாழ்ந்து வருவர்).
- முன்னவரைச் சேர்ந்தவர்கள் பெருங்கூட்டமாக இருப்பார்கள்.
- பின்னவரைச் சேர்ந்தவர்கள் சிறு கூட்டமாக3 இருப்பார்கள்.
- அவர்கள் (பொன்னும், இரத்தினங்களும்) பதிக்கப்பட்ட மஞ்சங்களில்,
- ஒருவரையொருவர் நோக்கியவாறு சாய்ந்திருப்பார்கள்.
- நன்மையில் என்றும் நிலைத்திருக்கும் படி செய்யப்பட்ட இளைஞர்கள் அவர்களுக்குப் பணி செய்ய வருவார்கள்.
- கிண்ணங்களையும், ஜாடிகளையும் பாய்ந்தோடும் நீரூற்றிலிருந்து (நிரப்பிய) குவளைகளையும் கொண்டு (வந்து பணி செய்வர்).
- அவர்களுக்குத் தலைவலியும் ஏற்படாது, அவர்கள் (போதை ஏறி) உணர்வு இழந்துவிடவும் மாட்டார்கள்.
- அவர்கள் தேர்ந்தெடுக்கும் பழங்களையும்,
- அவர்கள் விரும்பும் பறவைகளின் இறைச்சியையும் (பணி செய்யும் இளைஞர்கள் கொண்டு வருவர்).
- அகன்ற, அழகிய கண்களைக் கொண்ட பெண்கள் (அங்கு இருப்பர்).
- அவர்கள் நன்றாக மூடிய, பாதுகாக்கப்பட்ட முத்துக்களைப் போன்றவர்கள் ஆவார்கள்.
- (இவையெல்லாம்) அவர்கள் செய்த செயல்களுக்குக் கூலியாகக் கிடைக்கும்.
- அவர்கள் அங்கு வீணான அல்லது பாவமான எந்தப் பேச்சையும் செவியுற மாட்டார்கள்.
- சாந்தி, சாந்தி என்னும் (வாழ்த்துச்) சொல்லைத் தவிர,
- வலப்பக்கத்தவர்(களின் நிலையைப் பற்றியும் கேளும்). வலப்பக்கத்தவரின் நிலை என்ன? (என்பது உமக்குத் தெரியுமா?).
- அவர்கள் முள் இல்லாத இலந்தை மரத் தோட்டங்களில் (இருப்பர்).
- மேலும் குலை, குலையாகத் தொங்கும் வாழை(த் தோட்டங்) கள்,
- மிக்க விரிவான நிழல்,
- பாய்ந்தோடும் நீர்,
- மிகுதியான பழங்கள்,
- அவை குறையாதவையும், தடுக்கப்படாதவையும் ஆகும். (இவையெல்லாம் அவர்களுக்கு உண்டு).
- மேலும் மேன்மையான துணைவிகளும் (அவர்களுக்கு உண்டு).
- நிச்சயமாக நாம் அவர்களை நல்லமுறையில் படைத்துள்ளோம்.
- நாம் அவர்களைக் கன்னிகளாக ஆக்கியுள்ளோம்.
- அன்பு நிறைந்த, சம வயதுள்ளவர்களாக,
- வலப்பக்கத்தவருக்காக (ஆக்கியுள்ளோம்). ரு1
- முன்னவரைச் சேர்ந்த பெருங்கூட்டத்தினரும்
- பின்னவரைச் சேர்ந்த பெருங்கூட்டத்தினரும் (இருப்பார்கள்).
- இடப்பக்கத்தவர்(கள் நிலையைப் பற்றியும் நீர் கேளும்), இடப்பக்கத்தவரின் நிலை என்ன? (என்பது உமக்குத் தெரியுமா?).
- அவர்கள் பொசுக்கும் காற்றுகளுக்கிடையேயும், கொதிக்கும் நீரிலும்,
- கருப்புப் புகையின் நிழலிலும் (இருப்பர்).
- (அது) குளிர்ச்சியோ, புத்துணர்ச்சியோ தராததாகும்.
- அவர்கள் இதற்கு முன்னர் மிக்க நிறைவான வாழ்க்கை வாழ்ந்து வந்தனர்.
- அவர்கள் பெரும்பாவத்தைப் பிடிவாதமாகச் செய்து வந்தனர்.
- என்ன! நாங்கள் மரணமடைந்து, மண்ணாகவும், எலும்புகளாகவும் ஆகி விடும் போது, நாங்கள் மீண்டும் எழுப்பப்படுவோமா? என்று அவர்கள் கூறி வந்தனர்.
- எங்கள் முந்தைய மூதாதையர்களுமா (எழுப்பப்படுவர்?).
- நீர் கூறுவீராக: (ஆம்) முற்காலத்திலுள்ளவர்களும், பிற்காலத்திலுள்ளவர்களும்,
- எல்லோரும் குறிப்பிட்ட ஒரு நாளின், குறித்த நேரத்தில் ஒன்றுதிரட்டப்படுவார்கள்.
- பின்னர் பொய்யாக்கிய, வழிதவறியவர்களே! நீங்கள்,
- நிச்சயமாக கள்ளிமரத்திலிருந்து உண்ணுவீர்கள்.
- அதனைக் கொண்டு உங்கள் வயிறுகளை நிரப்புவீர்கள்.
- அதற்கு மேல் கொதிக்கும் நீரைக் குடிப்பீர்கள்.
- தாகமுள்ள ஒட்டகம் குடிப்பது போன்று குடிப்பீர்கள்.
- தீர்ப்பு நாளில் அவர்களுக்குரிய விருந்தோம்பல் இதுவே.
- நாமே உங்களைப் படைத்தோம். பின்னர் ஏன் நீங்கள் (உண்மையை) ஒப்புக் கொள்வதில்லை.
- நீங்கள் வெளியாக்குகின்ற (விந்)தைப் பற்றி நீங்கள் என்ன நினைக்கிறீர்கள்?
- அதனை நீங்கள் படைக்கின்றீர்களா? அல்லது நாம் படைக்கின்றோமா?
- நாம் உங்கள் எல்லோருக்கும் மரணத்தை விதித்துள்ளோம். எவராலும் எம்மைத் தாண்டி விட முடியாது.
- நாம் உங்கள் உருவத்தை மாற்றி, நீங்கள் அறியாத ஒன்றாக உங்களை எழுப்புவதிலிருந்தும் (எம்மை எவராலும் தடுத்து விட இயலாது)5.
- நிச்சயமாக நீங்கள் முதல் படைப்பை அறிந்தே இருக்கிறீர்கள். பின்னர் ஏன் நீங்கள் சிந்திப்பதில்லை?
- நீங்கள் விதைப்பதைக் கவனிக்கின்றீர்களா?
- அதனை நீங்கள் வளரச் செய்கிறீர்களா? அல்லது நாம் வளரச் செய்கின்றோமா?
- நாம் விரும்பியிருந்தால் அதனையெல்லாம் காய்ந்து போன சருகுகளாக ஆக்கியிருப்போம். பின்னர் நீங்கள் புலம்பிக் கொண்டிருந்திருப்பீர்கள்:
- 'நிச்சயமாக நாங்கள் செலவு செய்த தொகையினால் அழுத்தப்பட்டுள்ளோம்',
- 'அவ்வாறன்று, நாங்கள் கைவிடப்பட்டவர்களாகி விட்டோம்' (எனக் கூறுவீர்கள்).
- நீங்கள் அருந்தும் தண்ணீரைப் பார்த்தீர்களா?
- அதனை மேகத்திலிருந்து இறக்குபவர்கள் நீங்களா? அல்லது அதனை நாம் இறக்குகின்றோமா?
- நாம் விரும்பியிருந்தால், அதனை நாம் கசப்பானதாக ஆக்கியிருப்போம். பின்னர் ஏன் நீங்கள் நன்றி செலுத்துவதில்லை?
- நீங்கள் எரிக்கின்ற நெருப்பைப் பார்த்தீர்களா?
- அதற்குரிய மரத்தை நீங்கள் உற்பத்தி செய்கின்றீர்களா? அல்லது நாம் உற்பத்தி செய்கின்றோமா?
- நாம் அதனை நினைவூட்டக் கூடியதாகவும்6, பயணிகளுக்குப் பயனுள்ளதாகவும் ஆக்கியுள்ளோம்.
- எனவே நீர் மகிமை மிக்க உமது இறைவனின் பெயரைக் கொண்டு அவனது தூய்மையினை எடுத்துரைப்பீராக. ரு2
- நான் நட்சத்திரங்களின் நிலைகளைச் சான்றாகக் காட்டுகிறேன்.
- நீங்கள் அறிந்திருப்பின் நிச்சயமாக இது மாபெரும் சான்றாகும்.
- நிச்சயமாக இந்தக் குர்ஆன் மேன்மை மிக்கதாகும்.
- (இது) நன்கு பாதுகாக்கப்பட்ட ஒரு நூலிலுள்ளதாகும்7.
- தூய்மையாக்கப்படுபவர்களைத் தவிர வேறெவரும் அதனைத் தொட மாட்டார்கள்8. (அதாவது அதன் மகத்துவத்தையும், உண்மையையும் உணர முடியாது).
- இது எல்லா உலகங்களுக்கும் உரிய இறைவனிடமிருந்து இறங்கியுள்ள ஒன்றாகும்.
- இந்த(இறை) வசனத்தை நீங்கள் அற்பமானதாகக் கருதுகிறீர்களா?
- நீங்கள் அதைப் பொய்யாக்குவதை உங்கள் வாழ்விற்குத் தேவையான பொருளாக ஆக்கிக் கொண்டீர்களா?
- (மரணமடையவிருக்கும் ஒருவனது உயிர்) தொண்டையை வந்தடையும் போது, பின்னர் ஏன்,
- அந்த நேரத்திலும் நீங்கள் பார்த்துக் கொண்டிருக்கிறீர்கள்.
- உங்களை விட நாம் அவனுக்கு மிக அருகில் இருக்கிறோம். ஆனால் நீங்கள் பார்ப்பதில்லை (இந்த உண்மையை அறிய மாட்டீர்கள்).
- உங்களுக்கு எந்தக் கேள்வி கணக்கும் இல்லை என்றால்,
- நீங்கள் உண்மையாளர்களாயின் அதனை ஏன் உங்களால் திரும்பக் கொண்டு வர இயல்வதில்லை?
- எனவே ஒருவர் (இறைவனுக்கு) நெருக்கமானவர்களைச் சேர்ந்தவராக இருந்தால்,
- அவருக்கு ஆறுதலும், (மகிழ்ச்சிக்குரிய) நறுமணமும், பேரின்பத் தோட்டமும் உண்டு.
- அவர் வலப்பக்கத்தவரைச் சேர்ந்தவராக இருந்தால்,
- வலப்பக்கத்தவரைச் சேர்ந்தவரே! உமக்குச் சாந்தி உண்டாவதாக (என்று அவரிடம் கூறப்படும்).
- ஆனால், அவர் வழிதவறிய, பொய்யாக்குபவர்களைச் சேர்ந்தவராக இருந்தால்,
- (அவருக்குக் கிடைப்பது) கொதிக்கும் நீர் விருந்தும்,
- நரகத்தில் எரிவதுமாகும்.
- நிச்சயமாக இதுவே உறுதியான உண்மை.
- எனவே நீர் மகத்தான உமது இறைவனின் பெயரைக் கொண்டு அவனது தூய்மையினை எடுத்துரைப்பீராக. ரு3
