அதிகாரம்: அல்முர்ஸலாத்
அருளப்பெற்ற இடம்:
மக்கா | வசனங்கள்: 51
பிரிவுகள்: 2
- அளவற்ற அருளாளனும், மேன்மேலும் கருணைகாட்டுபவனுமாகிய அல்லாஹ்வின் பெயரால் (ஓதுகின்றேன்).
- மென்மையாக செய்தி தெரிவிக்கும் தூதுவர்களை (நான்) சான்றாகக் காட்டுகிறேன்.
- பின்னர் விரைவாகச் செல்பவர்களைச் சான்றாகக் காட்டுகிறேன்1.
- (உண்மையை) மிகச்சிறந்த முறையில் பரப்புபவர்களையும்2,
- தெளிவான வேறுபாட்டை எடுத்துக்காட்டுபவர்களையும்3,
- அறிவுரையை (வெகுதூரம்) எடுத்துச் செல்பவர்களையும் சான்றாகக் காட்டுகிறேன்.
- மன்னிப்பதற்காகவும், எச்சரிப்பதற்காகவும்,
- நிச்சயமாக, உங்களிடம் வாக்களிக்கப்பட்டது நிறைவேறியே தீரும்.
- நட்சத்திரங்கள் (தம்) ஒளியை இழந்து விடுமாறு செய்யப்படும் போதும்4,
- வானம் பிளக்கப்படும் போதும்5,
- மலைகள் பறந்து விடுமாறு செய்யப்படும் போதும்6,
- எல்லாத் தூதர்களும் குறிப்பிட்ட நேரத்தில் தோற்றுவிக்கப்படும் போதும் 7,
- (இந்த நிகழ்ச்சிகளுக்குரிய) நேரம் எந்த நாளிற்காகக் குறிப்பிடப்பட்டுள்ளது.
- தீர்ப்பு நாளிற்காக.
- தீர்ப்பு நாள் என்றால் என்னவென்று நீர் அறிவீரா?
- அந்நாளில், (உண்மையைப்) பொய்யாக்குபவர்களுக்கு அழிவு தான்!
- முற்காலச் சமுதாயத்தினர்களை நாம் அழிவிற்குள்ளாக்கவில்லையா?
- அவர்களுக்குப் பின் தோன்றிய சமுதாயத்தினர் இப்பொழுது அவர்களைப் பின்தொடருமாறு நாம் செய்வோம்8.
- குற்றவாளிகளுடன் நாம் இவ்வாறே நடந்து கொள்கிறோம்9.
- அந்நாளில், (உண்மையைப்) பொய்யாக்குபவர்களுக்கு அழிவுதான்!
- நாம் உங்களை ஓர் அற்பமான திரவத்திலிருந்து படைக்கவில்லையா?
- பின்னர் நாம் அதனைப் பாதுகாப்பான ஓரிடத்தில் வைக்கவில்லையா?
- அறியப்படும் ஒரு காலக்கட்டம் வரை;
- இவ்வாறாக, நாம் ஒரு கால அளவை ஏற்படுத்தியுள்ளோம். நாம் மிகச்சிறந்த முறையில் கால அளவை ஏற்படுத்துபவர்களாவோம்.
- அந்நாளில், (உண்மையைப்) பொய்யாக்குபவர்களுக்கு அழிவுதான்!
- நாம் பூமியை திரட்டி வைத்துக் கொள்ளக் கூடியதாக ஆக்கவில்லையா?10
- உயிருள்ளவர்களையும், மரணமடைந்தவர்களையும்.
- நாம் அதில் உயரமான மலைகளை அமைத்து, அருந்துவதற்கு இனிமையான நீரை உங்களுக்கு வழங்கினோம்11.
- அந்நாளில், (உண்மையைப்) பொய்யாக்குபவர்களுக்கு அழிவுதான்!
- நீங்கள் பொய்ப்படுத்தியதை நோக்கி இப்பொழுது செல்லுங்கள்; (என்று நாம் அவர்களிடம் கூறுவோம்).
- (அதாவது) மூன்று பகுதிகளைக் கொண்ட நிழலை நோக்கிச் செல்லுங்கள்12.
- அது நிழலைத் தரக்கூடியதும் அல்ல; தீச்சுடரிலிருந்து பாதுகாப்பும் தருவதில்லை.
- அது (மிகப்பெரிய) கோட்டைகளைப் போன்ற தீப்பொறிகளை எறிகின்றது.
- அது மஞ்சள் நிற ஒட்டகங்களைப் போன்றதாக இருக்கும்.
- அந்நாளில், (உண்மையைப் ) பொய்யாக்குபவர்களுக்கு அழிவுதான்!
- இது அவர்களால் பேச இயலாத நாளாகும்.
- அவர்கள் சாக்குப்போக்குக் கூறுவதற்கும் அனுமதிக்கப்பட மாட்டார்கள்13.
- அந்நாளில், (உண்மையைப்) பொய்யாக்குபவர்களுக்கு அழிவுதான்!
- இது தீர்ப்பு (கூறப்படும்) நாளாகும்; நாம் உங்களையும், முற்காலத்து எல்லா(ச் சமுதாயத்தின) ரையும் ஒன்று திரட்டுவோம்.
- இப்பொழுது உங்களிடம் ஏதேனும் திட்டம் இருந்தால் அதனை எனக்கு எதிராகப் பயன்படுத்துங்கள்.
- அந்நாளில், (உண்மையைப்) பொய்யாக்குபவர்களுக்கு அழிவுதான்! ரு1
- நிச்சயமாக, இறையச்சமுடையவர்கள் நிழல்களுக்கும், நீரூற்றுகளுக்கும், (இடையே இருப்பார்கள்.)
- அவர்களுக்கு விருப்பமான பழங்களுக்கும் இடையேயும் இருப்பார்கள்.
- நீங்கள் செய்த செயல்களுக்குக் கூலியாக இன்பத்துடன் உண்ணுங்கள்; அருந்துங்கள் (என்று அவர்களிடம் கூறப்படும்).
- நிச்சயமாக, நாம் நன்மை செய்பவர்களுக்கு இவ்வாறே நற்பலனளிக்கின்றோம்.
- அந்நாளில், (உண்மையைப்) பொய்யாக்குபவர்களுக்கு அழிவுதான்!
- உண்ணுங்கள்; (இவ்வுலக வாழ்வின்) சிறிது சுகத்தை அனுபவியுங்கள்; நிச்சயமாக, நீங்கள் குற்றவாளிகளாவீர்கள் (என்று நாம் அவர்களிடம் கூறுவோம்).
- அந்நாளில், (உண்மையைப்) பொய்யாக்குபவர்களுக்கு அழிவுதான்!
- குனிந்து வணங்குங்கள் என்று அவர்களிடம் கூறப்பட்டால், அவர்கள் குனிந்து வணங்குவதில்லை.
- அந்நாளில், (உண்மையைப்) பொய்யாக்குபவர்களுக்கு அழிவுதான்!
- எனவே, அவர்கள் இதற்குப் பின்னர் எந்த வார்த்தையில் நம்பிக்கை கொள்வார்கள்? ரு2
